உலக மகளிர் தினத்தை முன்னிட்டு பேராதனைப்பல்கலைக்கழக 2020ஆம் ஆண்டிற்கான செயற்குழு "மாதரே.."  என்ற நிகழ்வினை நடாத்துவதற்கு தீர்மானித்து, 12.03.2020 திகதியன்று மாலை 5 மணியளவில் பேராதனைப் பல்கலைக்கழக, பல் மருத்துவபீட, பம்பரதெனிய மண்டபத்தில் அதனை நிகழ்த்தியது.

மகளிர் தினத்திற்கு சார்பாக மகளிரை மையப்படுத்திய இணைய வழி கவிதைப்போட்டி முன்கூட்டியே நடத்தப்பட்டதோடு, அன்றைய தினத்தில்  நாடக அரங்கேற்றம் உள்ளிட்ட நிகழ்வுகளுடன்  "பெண் உணர்வுகளை வெளிப்படுத்தும் தமிழ் திரையிசை கானங்கள்" என்ற இசைக்கச்சேரியும் நடைபெற்றது..

நிகழ்வின் இறுதியில்  கவிதைப்போட்டிக்கான வெற்றியாளர்களுக்கு சான்றிதழ்களும் பரிசில்களும் வழங்கப்பட்டன. இந்நிகழ்விற்கு பேராதனைப் பல்கலைக்கழக விரிவுரையாளர்களும் மாணவர்களும் பெருந்திரளாக வருகைத் தந்து சிறப்பித்தனர்.

#உதவிக்கரம் நீட்டுவோம் நம்_உறவுகளுக்காய்.... 

2019ம் ஆண்டின் இறுதிப்பகுதியில் சீனாவின் வூஹான் நகரில் தோன்றியதாக கருதப்படும் கொரோனா எனப்படும் கொவிட் 19 தொற்றானது உலக நாடுகளில் வெகு வேகமாக பரவலடைந்து, எமது நாட்டிலும் 2020 மார்ச் நடுப்பகுதியில் பரவலடையத் தொடங்கியது. 

பல்கலைக்கழகங்கள் உள்ளிட்ட அனைத்து சமூக நிறுவனங்களும் அரசினால் தற்காலிகமாக மூடப்பட்டன. நாடு தழுவிய ஊரடங்கினால் அன்றாடம் உழைத்துண்ணும் மக்கள் வெகுவாக பாதிக்கப்பட்டனர். இம் மக்களுக்கு ஏதேனும் வகையில் உதவ வேண்டும் என்ற நோக்குடன் பேராதனைப் பல்கலைக்கழகத் தமிழ்ச்சங்கம் உதவும் கரங்கள் என்ற நிவாரணப்பணியினை முன்னெடுத்தது. இணைய வழியில் உதவிகளை திரட்டி பாதிப்புற்ற எம்மக்களுக்கு அவற்றை கொண்டு சேர்த்தது. 

முதற்கட்டமாக பலாங்கொடை என்ற பிரதேசத்தில் வேவத்தை என்ற கிராமத்தில் உள்ள, சமுர்த்தி நிவாரணம் கிடைக்கப்பெறாத  குடும்பங்களுக்கு  நிவாரண உதவிகளை தமிழ்ச்சங்கம் வழங்கியது.

அதன் பின்னர் பிரித்தானிய சைவத்திருக்கோயில் ஒன்றியத்துடன் கைகோர்த்து நுவரெலியா,ஹட்டன், கண்டிப் பிரதேசங்களிலும் நிவாரண உதவிச் செயற்பாடுகளை முன்னெடுத்தது தமிழ்ச்சங்கம்.

கலையையும் தமிழையும் பல்கலைக்கழக மட்டத்தில் வளர்க்க முனையும் பேராதனைப் பல்கலைக்கழகத் தமிழ்ச்சங்கம், சமூகம் இடர்ப்பட்ட நேரத்தில் களப்பணியில் இறங்கியமை மூலம் புதுவித அனுபவங்களைப் பெற்றுக்கொண்டது.  இனி வரும் காலங்களிலும் இதுபோன்ற செயற்பாடுகள் தொடரும்..

விழித்துக் கொள்வோம்... விழிப்புணர்வூட்டுவோம்...

#மீம்ஸ்  போட்டித்தொடர் 2020.

கொவிட் 19 தொற்று காரணமாக அமுல்படுத்தப்பட்ட நாடுதழுவிய ஊரடங்கினால் சகல செயற்பாடுகளும் இணையவழியில் நடாத்தப்படத்தொடங்கின.

பல்வோறு சங்கங்களும், அமைப்புக்களும் பலவிதமான போட்டித்தொடர்களையும் விழிப்புணர்வுகளையும் முகநூல், வலையொளி (youtube) போன்றவற்றின் ஊடாக கொண்டு நடத்தத் தொடங்கிய காலவெளியில் தமிழ்ச்சங்கம் சற்று வித்தியாசமான ஒரு போட்டித்தொடரை முகநூல் வாயிலாக அறிமுகப்படுத்தியது. 

புகைப்பட இணைப்புக்களைக் கொண்டு செய்திகளை கடத்தும் மீம்ஸ்   எனப்படும் சிற்றூடகத்தில் விழிப்புணர்வூட்டும் நோக்கத்துடன் ஒரு போட்டித்தொடரை அகில இலங்கை ரீதியில் செயற்படுத்தியது. 

சுமார் 300இற்கும் மேற்பட்ட மீம்கள் இப்போட்டிக்காக வந்துசேர, அவற்றில் சிறந்தவற்றை தெரிவு செய்து விழிப்புணர்வு நோக்கில் முகநூல் உள்ளிட்ட சமூக வலைத்தளங்களில் பதிவிட்டு கொவிட் தொற்றிலிருந்து மக்கள் பாதுகாப்பாக இருக்க, புதுவித விழிப்புணர்வூட்டலை தமிழ்ச்சங்கம் முன்னெடுத்தது.